د افغانستان 19 کلونو کرکټ لوبډلې اتلولي
د نولس کلنو ځوانانو د درې اړخیزو سیالیو په لړ کې افغانستان د یوویشت منډو په توپیر پاکستان ته ماتې ورکړه او د دې سیالیو اتلولي یې وګټله.
پایلوبه پرون د کابل پر وخت سهار لس بجې د عربي متحده اماراتو په کوربتوب پیل شوه چې افغان لوبډلې لومړۍ توپوهنه وکړه.افغان توپوهونکو په پنځوس اورونو کې نهه لوبغاړي له لاسه ورکړل او دوه سوه پنځوس منډې یې وکړې.په دې سیالۍ کې د افغان توپوهونکو له ډلې برکت ابراهیمزي نهه اویا، نظیفالله امیري شپږپنځوس او فیصل خان یوڅلوېښت منډې وکړې.پاکستان لوبډلې د اته څلوېښت اورونو په لوبولو سره ټول لوبغاړي له لاسه ورکړل، دوه سوه نهه ویشت منډې وکړې او د یوویشت منډو په توپير یې ماتې وخوړه.د افغانستان د توپ اچونکو په ډلګۍ کې نصیر معروف خېل او نصرت نورستاني دوه دوه لوبغاړي وسوځول.دغه درې اړخیزې سیالۍ چې د نومبر په دیارلسمه نېټه د افغانستان، پاکستان او عربي متحده اماراتو په ګډون پیل شوې وې، تر اووه سیالیو وروسته د افغانستان په اتلوۍ پای ته ورسېدې
