ښځه ولې په زده کړو ځوروئ؟
په ټولنه کې د خلکو ذهنیت داسې دی چې ښځه یا د کور ده یا د ګور ده. دا هم باید له یاده ونه باسو چې د ښځې نه شتون نر پوره کولی شي او که نه؟
زموږ په ټولنه کې دخلکو ذهنیت داسې دی چې ښځه يا د کور ده یا د ګور ده خو په دې اړه هم باید فکر وشي چې د ښځينه استادې، ډاکټرې ، نرسې او نورو دنده کوم نارینه پوره کولی شي؟
نه.
هر سړی پیدا دی خپل خپل کار لره کنه.
که په يوه کورنۍ کې یوه زده کړې مېرمن وي نو د هغې د اولادونو په خبرو، کړو وړو ، پوښاک او هرڅه کې له نورو کوچنیانو سره توپير وي. ښځه کولای شي نسلونه په سمه توګه وروزي . یوازې په زانګو کې د ماشوم زنګول د ښځې کار نه دی بلکې هغه/هغې ته د ښې روزنې رول هم باید مور ولوبوي ځکه مور د ماشوم لپاره مدرسه ده ترڅو په کې ښه روزنه وويني او ډېر څه په کې یاد کړي.
يوه زده کړې مور کولای شي خپلې لور ته د هغې د پېغلتوب، ناروغیو او نورو ګڼو مسایلو په اړه معلومات ورکړي او هغه پرې وپوهوي. يوه زده کړې مور کولای شي د ملګرې په توګه له خپلې لور څخه پوښتنې واوري او ورته حل يې کړي.
نو:
ښځه يوازې په کور مه پرېږدئ. هغې ته د زده کړو حق ورکړئ ترڅو ستاسې راتلونکې ټولنه نالوستې او ناپوهه پاتې نه شي.
تگ
