په کابل کې د جودو روزونکو او لوبڅارانو ته سيمنار پيل شو
په کابل کې د جودو روزونکو او لوبڅارانو ته د دوو بهرنیو روزونکو له خوا درې ورځنى ښوونيز سيمنار پيل شو.
د پلازمېنې کابل په انټر کانټیننټال هوټل کې د اسپانیا هیواد د جودو دوو روزونکو او لوبڅارانو "کوميچو فريز او بارکس نيګاري" له لوري د جودو ورزشي رشتې ٧٠تنو افغان روزونکو او لوبڅارانو ته د کوچينګ، ريفرينګ او په کاتا برخو کې درې ورځنى ښوونيز سيمنار پيل شو.
د دغه سيمنار د پيل په مراسمو کې د بدني روزنې او سپورټ عمومي ریاست د دفتر رئيس محمد الله احساس، د المپيک ملي کمېټې اجرائیه رئیس داد محمد پاينده اختري، د ورزشي فدراسیونونو امر محمد اعظم کوهي، د جودو فدراسیون رئیس ذبيح الله نظري، د جودو فدراسیون مرستیال حاجي شاه اغا، دوو بهرنيو روزونکو کوميچو فريز او بارکس نيګاري، روزونکو، لوبڅارانو او ورزشکارانو شتون درلود.
د ياد ښوونيز سيمنار د پيل په مراسمو کې د جودو فدراسیون رئیس ذبيح الله نظري راغلو مېلمنو ته د ښه راغلاست ترڅنګ وویل: دا لومړى ځل دى، چې دا ډول سيمنار دايريږي؛ نو له دې سيمنار څخه بايد نهايي استفاده او زده کړه وکړو او بيا يې په ولايتونو کې عملي کړو.
ورپسې د بدني روزنې او سپورټ عمومي ریاست د دفتر رئیس محمد الله احساس خبرې وکړې نوموړي وويل؛ د المپيک ملي کمېټې او سپورټ عمومي رياست له ټولو ورزشي فدراسیونونو ملاتړ کوي او له ټولو روزونکو او لوبڅارانو څخه مو دا غوښتنه ده، چې له دې سيمنار څخه زده کړه وکړي.
ښاغلي احساس همدا راز زياته کړه؛ ورزشکاران بايد نړيوالو ته له افغانستان څخه مثبت تصوير وړاندې کړي او نه يوازې دا چې په خپلو کې خپل کلتور، فرهنګ او تجربې سره شريکي کړي؛ بلکې بهرنيو روزونکو ته هم د افغانستان کلتور وړاندې کړي.
نوموړي په خپلو خبرو کې وويل؛ په هېواد کې ورزش د ودې او پراختيا په حال کې دی ان تر دې چې اوس تر ولايتونو، ولسواليو او کليو پورې د ورزش لمن غځېدلې ده.
بل خوا د همدې سيمنار ګډونوالو ته د المپيک ملي کمېټې اجرائیه رئیس داد محمد پاينده اختري خبرې وکړې او له ټولو روزونکو يې وغوښتل، چې له ياد سيمنار څخه په ملي او نړيواله کچه استفاده وکړي.
په ورته مهال د جودو يوه تن بهرني روزونکي بارکاس د سيمنار ګډونوالو ته په خپلو خبرو کې وويل؛ د جودو نړيوال فدراسیون رهبري تل هڅه کړې، چې د جودو په برخه کې ښه پروګرامونه وړاندې کړي او د جودو ورزش ته په نړيواله کچه وده ورکړي.
نوموړي دا سيمنار د يو بل کلتور او عنعناتو د شريکولو په برخه کې يو ښه فرصت ياد کړ.
د جودو فدراسیون د روزونکو او لوبڅارانو لپاره د کوچينګ، ريفرينګ او کاتا برخو په ياد سيمنار کې د کابل، سرپل، فارياب، جوزجان، بلخ، بغلان، کندز، تخار، فراه، هرات او پکتیا ولايتونو تر ٧٠ تنو روزونکو، لوبڅارانو او ورزشکاران ګډون کړی.
دغه سيمنار، چې درې ورځې به دوام وکړي د جودو نړيوال فدراسیون دوو بهرنيو روزونکو او نړيوالو متخصصينو " کوميچو فريز او بارکاس نيګاري" له لوري پر مخ وړل کېږي، چې د کوچينګ، ريفرينګ او کاتا په برخو کې به د جودو افغان روزونکو او لوبڅارانو ته په نظري او عملي بڼه زده کړې ورکړي.
د جودو فدراسیون د معلوماتو له مخې دا لومړى ځل دى، چې دغه بهرني روزونکي افغانستان ته راځي او دا ډول سيمنار وړاندې کوي، چې په دې سره به د جودو افغان روزونکي او لوبڅاران د کوچينګ، ريفرينګ او کاتا په برخه کې په ملي او نړيواله کچه چمتو شي.
تگ
