د کام ایر ، غضنفر او کفایت ګروپ مسؤلین وستایل شول
د المپیک ملي کمېټې او سپورټ عمومي ریاست د مشرتابه له لوري د کام ایر ، غضنفر او کفایت ګروپ مسؤلین وستایل شول .
د هیواد د المپیک ملي کمېټې او سپورټ عمومي ریاست د رئیس نظرمحمد مطمئن او مله پلاوي له لوري ، په مزار شریف کې د کام ایر هوایي شرکت، غضنفر او کفایت ګروپونو مسؤلین له ورزش سره د همکارۍ په پار، په ستاینلیکونو او د ویاړ پګړیو په ور په سر کولو سره وستایل شول.
په دې ستاینغونډه کې د ښاغلي نظر محمد مطمئن ترڅنګ د بدني روزنې او سپورټ عمومي ریاست فني او مسلکي مرستیال حافظ احمد جان ځدراڼ، لیکوال او د هیواد فرهنګي شخصیت استاد محمد زمان مزمل او یو شمېر نورو سیمه ییزو چارواکو هم ګډون درلود.
یادو شرکتونو او مسولینو د ورزش په بېلابېلو برخو کې همکاري کړې وه، د بېلګې په توګه کام ایر هوایي شرکت د والیبال له ملي لوبډلې سره د مالدیف هیواد په سیالیو کې او همدا شان غضنفر او کفایت ګروپ په بلخ کې د وزلوبې په ټورنمنټ او په یو شمېر نورو برخو کې همکارۍ کړې وې.
د یادولو ده، چې د هیواد د المپیک ملي کمېټې او سپورټ عمومي ریاست رئیس نظرمحمد مطمئن او ورسره مل پلاوی د څو ورځو راهیسې په بلخ ولایت کې دی او هلته یې له ورزشي مسوولینو، ورزشکارانو سمیه ییزو چارواکو سره د لیدلو ترڅنګ ، له هغوی سره د ورزش په برخه کې د بېلابېلو موضوعګانو په تړاو خبرې اترې کړي دي.
بلخ ولایت ته د المپیک ملي کمېټې او سپورټ عمومي ریاست مشرتابه دا سفر په داسې حال کې کیږي، چې هلته د هیواد په کچه د یوولس ولایتونو تر منځ د وزلوبې ټورنمنټ هم پیل شوی ، چې د روان کال د کب میاشتې تر ۲۵ مې نېټې پورې به دوام وکړي.
تگ
