د خیبر پښتونخوا ایالت چارواکو د دې ولایت په مختلفو سیمو کې د امنیتي تدابیرو د ټینګولو اعلان کړی دی.

د خیبر پښتونخوا ایالت اعلی وزیر سهیل خان افریدي ویلي دي چې د ترهګرۍ ضد څانګې د پیاوړتیا لپاره درې څلویښت ملیونه ډالر ځانګړي شوي دي.د هغه په وینا د دې پریکړې پر بنسټ، د سایبیري، استخباراتو او عملیاتي عمل په ګډون په مختلفو څانګو کې به شپږسوه اته دیرش عملیاتي ځواکونه استخدام شي.آفریدي وویل چې د وسلو، زغره والو موټرو او عملیاتي تجهیزاتو د پیرودلو لپاره تمویل هم په ورته چوکاټ کې نهایی شوی دی.هغه د خیبر پښتونخوا په مرکز پیښور کې د ترهګرۍ ضد څانګې د نوي سیمه ایز مرکزي دفتر د جوړولو او د دې ادارې د ودانیو د جوړولو اعلان هم وکړ، چې موخه یې د امنیت پیاوړتیا ده.