د ایران د ملي امنیت عالي شورا سکرتریت تېره شپه اعلان وکړ چې دې ادارې د ایران د اسلامي جمهوریت د اساسي قانون د یو سل او شپږ اویا مادې په چوکاټ کې د سترې دفاعي شورا د جوړولو منظوري ورکړې ده.

د ایران د ملي امنیت عالي شورا په اعلامیه کې راغلي چې د دفاع شورا به په دفاعي پلانونه بیاکتنه وکړي او د وسله والو ځواکونو وړتیاوې به په مرکزي ډول لوړې کړي.د دې شورا مشري د ایران د اسلامي جمهوریت د ولسمشر په غاړه ده چې د وسله والو ځواکونو د مشرانو، قوماندانانو او ځینو اړوندو وزارتونو څخه جوړه ده.