د ایران دولت څلور سوه څلور اتیا افغان بندیان هېواد ته راولېږدول

دا بندیان د چهارشنبې په ورځ د نیمروز په پوله کې د سرپرست حکومت چارواکو ته وسپارل شول.دا کسان چې د ایران په اووه ویشت ولایتونو کې په زندانونو کې بندیان وو د ایران او افغانستان ترمنځ د بندیانو د لیږد او د مجرمینو د ګرځولو په اړه د دوه اړخیزو تړونونو په چوکاټ کې هیواد ته راستانه شول.د ایران د بشري حقونو او نړیوالو چارو د عدلیې مرستیال وزیر عسکر جلالیان ویلي دي چې د دغو کسانو جرمونه سیاسي نه دي او د افغانستان د سرپرست حکومت سره هیڅ تړاو نلري.هغه په وینا ډیری دغه بندیان د مخدره توکو اړوند جرمونو په تور په زندان کې وو او خپلې عمومي سزاګانې یې تېرې کړې وې.د سرپرست حکومت د زندانونو چارو مشر محمد یوسف مستري وویل چې بندیان به ولایتونو ته ولېږدول شي او هلته به یوه ځانګړې موده تیره کړي.