د سرپرست حکومت د احصایې او معلوماتو ملي اداره وايي چې د روان لمریز کال د دلوې په میاشت کې د افغانستان صادرات اتلس میلیونه ډالره کمښت سره مخ شوی دی.

د دې ادارې ویاند حلیم رافع وویل چې د روان کال په دلوې میاشت کې د صادراتو په برخه کې یوسل او څلور څلوېښت اعشاریه دوه میلیون ډالر او وارداتو کې یوسل او اووه شپېته اعشاریه یو میلیون ډالر ثبت شوي دي.داسې انګیرل کیږي چې د افغانستان په ختیځ کې د تورخم بندر د شاوخوا یوې میاشتې لپاره تړل کیدل د دې ستونزې اصلي لامل دی.په ورته وخت کې د افغانستان د سوداګرۍ او پانګونې خونه وايي چې د افغانستان واردات او صادرات یو شان نه دي، او واردات د صادراتو په پرتله څو چنده لوړ دي چې د افغانستان اقتصاد ته یې ستونزې پیدا کړې دي.