د سرپرست حکومت د اوبو او انرژۍ وزیر عبداللطیف منصور وايي چې کابل ته د پنجشیر د اوبو د لیږد پروژې سروې او ډیزاین بشپړ شوی او عملي کار به یې د کابینې له تصویب او تمویل وروسته پیل شي.

هغه وويل چې دا کولی شي په کابل کې د اوبو د کمښت یوه لویه برخه حل کړي.د سرپرست حکومت چارواکي دا هم وویل چې کابل ته نږدې د شاه او عروس بند بشپړ شوی او د للندر شاتوت بند پروژه هم د راتلونکي کال په بودیجه کې شامله شوې ده.د یادونې وړ ده چې کابل ته د پنجشیر د اوبو د لیږد پروژه د جمهوريت دورې په جریان کې ډیزاین شوې وه. خو پخوانی حکومت یې په پلي کولو کې پاتې راغی.