د سرپرست حکومت ویاند ذبیح الله مجاهد د کندهار-هرات د اووه سوه اووه دیرش کیلومتره اوږدې ریل پټلۍ د سروې او ډیزاین د پیل اعلان وکړ.

د سرپرست حکومت ویاند په ایکس پاڼه کې لیکلي چې د دې پروژې په بشپړیدو سره به ترکمنستان او ایران د افغانستان له لارې له پاکستان سره ونښلول شي.هغه وويل چې دا د سوداګرۍ او ترانزیت په برخه کې یو مهم اقتصادي ګام دی.د ټولګټو چارو وزارت ویاند محمد اشرف حق شناس د کندهار-هرات د اورګاډي پټلۍ د سروې او ډیزاین پروژې ارزښت له دوه سوه څلور شپیته ملیون افغانیو څخه ډیر اعلان کړ.د هغه په وينا، د دې پروژې ډيزاين به د اتو مياشتو په اوږدو کې بشپړ شي.ټولګټو چارو وزارت د دې پروژې د ډیزاین قرارداد پنځو خصوصي شرکتونو ته ورکړی دی.