د سرپرست حکومت د لوړو زده‌کړو وزارت ویلي، د یاد حکومت رهبر په لومړي ځل په کندهار پوهنتون کې په داسې حال کې وینا وکړه چې د پوهنتون استادانو او زده کړیالانو هم حضور درلود

‏د وزارت ویاند ضیاالله هاشمي له لوري په خپره شوې اعلامیه کې راغلي، شیخ هبت الله اخندزاده په خپلو خبرو کې د دیني او عصري زده‌کړو پر اهمیت ټینګار کړی او له محصلینو يې غوښتي چې د زده‌کړو له لارې هېواد د نورو سیال وګرځوي.‏د سرپرست حکومت مشر همداراز ویلي چې د پوهنتون او مدرسې ترمنځ واټن نشته.‏شيخ هبت الله اخندزاده زیاته کړې چې فرمانونه یې له قرآن او حديث اخیستل شوي او له علماو سره پرې مشوره شوې او په خبره یې که د اسلام خلاف وي نه دي منل کیږي.د هغه څرګندونې په داسې حال کې راځي چې د افغان ټولنې یوه برخه، په شمول د نجونو او ښځو، د ملا هبت الله اخوند زاده د مستقیم امر له مخې د زده کړې له حق څخه محرومه ده.