د پاکستان د پوځ لوی درستیز جنرال عاصم منیر وايي چې له افغانستان سره د دوی د کړکېچ اصلي لامل د ډیورنډ فرضي کرښې په اوږدو کې د ترهګرۍ مسله او د تحریک طالبان پاکستان ډلې شتون دی.

د پاکستان د پوځ مشر یو ځل بیا ادعا وکړه چې د افغانستان په خاوره کې د ټي ټي پي شتون ثابت شوی او سرپرست حکومت د اسلام آباد اندیښنو ته سم ځواب نه دی ورکړی.عاصم منیر دا موضوع د پښتونخوا په مرکز پیښور کې د مختلفو سیاسي ګوندونو مشرانو سره په یوه غونډه کې راپورته کړه.هغه یو ځل بیا ادعا کړې چې ترهګري د افغانستان له خاورې پاکستان ته داخله شوې ده؛ هغه تور چې سرپرست حکومت یې ردوي او وايي چې د شواهدو پر بنسټ، د داعش ترهګره ډله اوس مهال په بلوچستان ایالت کې پرته له کومې اندیښنې روزل کیږي او تمویل کیږي.