په بېجينګ کې د چين او روسيې د ولسمشرانو ترمنځ ليدنه او خبرې اترې
د چين او روسيې ولسمشرانو د پنجشنبې په ورځ په بېجينګ کې د خپلو خبرو په پيل کې، د دواړو هېوادونو ترمنځ د اړيکو پر ټينګښت او پیاوړتیا ټينګار وکړ.
د چين ولسمشر شي جين پينګ له خپل روسي سيال ولاديمير پوتين سره په خبرو کې ویلي چې چين به تل د روسيې ښه ملګری وي.پوتین هم ویلي چې د روسیې او چین ترمنځ سوداګري په ښه سرعت سره مخ په زیاتېدو ده او د دواړو هېوادونو ترمنځ په بېلابېلو برخو کې د پانګونې آتیا سترې ګډې پروژې جوړې شوې دي. د روسيې ولسمشر ټينګار کړی چې د روسيې او چين ترمنځ همکاري د هېچا پر ضد نه ده، بلکې په نړيواله صحنه کې د ثبات عامل دی.د روسيې او چين ولسمشرانو همدارنګه د ستراتېژيکو همکاريو د زياتوالي او د دواړو هېوادونو ترمنځ د ډيپلوماتيکو اړيکو د نوي دور د پيل په اړه ګډه اعلاميه لاسليک کړې ده.پوتین نن په دوه ورځني رسمي سفر چین ته ورسېد. مسکو هيله لري چې دغه سفر د امريکا د دوو پياوړو جيو پوليټيک سيالانو تر منځ، د ستراتېژيکو همکاريو د پراختيا لامل شي.
