د جوزجان ولایت د بدني روزنې او سپورت ریاست په همغږۍ د ماسټر سنوکر کلب په ورزشي سالون کې د نهو کلبونو د اتیا تنو ورزشکارانو ترمنځ د سنوکر غوره شوې سیالۍ د یارمحمد "جند محله" په اتلولۍ پای ته ورسېدې.

د دې لوبلړۍ په پایلوبه کې د شمال د سنوکر دوه لوبغاړو یار محمد جند محله او لطف الله حیدري یو له بل سره سیالي وکړه چې په پایله کې لوبه د درې پر پنځه په توپیر د یارمحمد جند محله په ګټه پای ته ورسېده.

د دغې لوبلړۍ د ترسره کولو موخه د جوزجان ولایت د سنوکر غوره لوبډلې ته د غوره څېرو ورپیژندل وو. په دې وروستیو کې د جوزجان د سنوکر لوبډلې لپاره لس غوره څېرې وټاکل شوې.

په پای کې د سپورت ادارې او سنوکر فدراسیون د مسوولینو له خوا ګټونکو لوبغاړو ته کپ، مډالونه او ستاینلیکونه ورکړل شول.