SAHAR

رسمي نکاح خط د واده د ثبتولو او د ښځې او خاوند د هویت تثبیت لپاره اړین سند دی چې د نړۍ په ډېري هېوادونو کې اوسېدونکو ته د دې سند لرل حتمي ده. واده او نکاح د نورو قراردادونو په څېر، دواړو اړخونو یا ښځې او خاوند لپاره حقونه او مسوولیتونه لري.

نو له دې امله باید د رسمي او قضایي ادارو سره ثبت شي؛ په رسمي محکمو کې د خلکو له خوا د نکاح خط اخیستل په ډېرو مواردو کې په هېواد دننه او بهر کې او په ځانګړې توګه د کورنیو او بهرنیو سفرونو او همدارنګه نورو هېوادونو ته د کډوالۍ یا پناه غوښتنې په چارو کې ښځې او خاوند ته اسانتیاوې رامنځته کوي.

په کابل ولایت کې نکاح خط څنګه اخیستل کېږي؟

غوښتونکي د نکاح خط د ترلاسه کولو لپاره لاندې پړاوونو څخه تېرېږي:

لومړی پړاو: غوښتنلیک او اړین اسناد

1. ښځه او خاوند یا ناکح او منکوحه خپل رسمي غوښتنلیک یا عریضه د کابل ولایت اړوندې محکمې ته د نکاح خط د اخیستلو په موخه چمتو کوي؛
2. هغه جوړې چې د کابل په ښار کې اوسېږي، خپل غوښتنلیک دې د اړوندې حوزې د اسنادو او وثایقو د ثبت آمریت ته ته او هغه جوړې چې په ولسوالیو کې مېشت دي، خپل غوښتنلیک د کابل ولایت د ولسوالیو په کچه ابتدایي محکمو ته وړاندې کوي؛
3. د کابل ښار د 12، 16، 21 او 22 ناحیو اوسېدونکي د لومړي حوزې د اسنادو او وثایقو د ثبت آمریت ته، د 2، 9 او 10 ناحیو اوسېدونکي د دویمې حوزې، د 3، 5، 13 او 14 ناحیو اوسېدونکي د دریمې حوزې، د 11، 17 او 18 ناحیو اوسېدونکي د څلورمې حوزې، د 1، 6، 7 او 8 د ناحیو اوسیدونکي د پنځمې حوزې او د 4، 15، 19 او 20 ناحیو اوسېدونکي د کابل ولایت د شپږمې حوزې د اسنادو او وثایقو د ثبت آمریتونو ته په ټاکل شویو ورځو کې مراجعه کوي؛
4. د غوښتنلیک د چمتو کولو پرمهال د ښځې او خاوند په 3x4 اندازه دوه انځورونو او اصلي تذکرو ته اړتیا ده؛
5.  د مهر پر اندازې سربیره د نکاح نېټه او د ماشومانو شمېر او نومونه هم په غوښتنلیک او وروسته په اصلي نکاح خط کې لیکل کېږي؛

دویم پړاو: اړوندې محکمې ته مراجعه

1. د کابل ولایت په مرکز کې له جوړې څخه یوه یې غوښتنلیک یا عریضه او اړین اسناد د وثایقو محکمې ته یا په اړونده ولسوالۍ کې د ابتداییه محکمې ته وړاندې او د محکمې رییس حکم په کې اخلي؛
2. اړونده محکمه په غوښتنلیک کې پر حکم ورکولو سربېره، غوښتونکو ته یوه فورمه یا استعلام د ډکولو په موخه ورکوي چې په هغه کې د اړخونو یا جوړې د پېژندنې معلومات، د استوګنې ځای، د جوړې د نکاح شونتیا او د هغوی ترمنځ د واده پر وړاندې د لنډمهاله او دایمي خنډونو د نشتوالي په تړاو پوښتنې دي؛
3. پر  فورمې سربېره د زرو (1000) افغانيو بانکي اویز چې د نکاح خط لګښت دی، هم جوړې ته ورکول کېږي څو ياده اندازه پيسې د افغانستان بانک په نمایندګۍ کې تحویل او تصدیق پاڼه یې محکمې ته وسپاري؛

درېیم پړاو: د ملا امام او ګذر تصدیق

1. فورمه یا استعلام د جومات ملا امام او دوو ګاونډیانو ته د پوښتنو ځوابولو لپاره وړل کېږي او بیا فورمه د ګذر وکیل، ناحیې او یا اړونده ولسوالۍ ته وړل کېږي څو هغوی هم فورمه تصدیق کړي؛
2.  دا فورمه له ډکولو وروسته باید د نورو پړاوونو د بشپړولو په موخه بېرته د اړوندې حوزې د وثایقو محکمې یا د اړوندې ولسوالۍ اړوندې ابتداییه محکمې ته وسپارل شي؛

څلورم پړاو: اقرار او شهادت

1. په دې پړاو کې دواړه اړخونه د خپل نکاح د ثبتولو لپاره، دوه شاهدان د هغو له اصلي تذکرو او دوو انځورونو سره محکمې ته حاضروي؛
2. اړونده برخه د جوړې او د دوو تنو شاهدانو معلومات د هغوی د اصلي تذکرو پر بنسټ په نکاح خط کې لیکي او قاضي ته یې وړاندې کوي؛
3. جوړې یا دواړه اړخونه د قاضي په حضور کې اقرار کوي چې د یوې ټاکلې اندازه مهر په بدل کې یو بل سره نکاح کړي چې شاهدان هم شاهدي ورکوي چې دواړه واده شوي دي؛ وروسته محکمه د نکاح خط د سپارلو نېټه جوړې ته ټاکي؛

پنځم پړاو: د نکاح خط اخیستل

1. له جوړې یوه یې په ټاکلې نېټه او ساعت اړوندې محکمې ته ځي او د خپلې اصلي تذکرې په ښودلو سره خپل نکاح خط چې ثبت او مهر شوی به وي، ترلاسه کوي؛
2. وروسته له جوړې څخه یوه یې نکاح خط د استیناف محکمې ته وړي او د استیناف محکمې رییس هم هغه تاییدوي؛
3. تر دې پړاوه پورې د نکاح خط کارونه خلاص شوي او په هېواد کې دننه کارول کېدای شي، خو په بهر کې د کارولو لپاره باید وژباړل شي.

د نکاح خط ژباړه

1. نکاح خط په کابل ولایت کې د ژباړې یو رسمي دفتر ته وړاندې کېږي څو په اړونده ژبه یې وژباړي، بيا د ژباړې دفتر د جواز او د رسميت لرلو او همدارنګه د نکاح خط د معلوماتو د کره والي د تصدیق په موخه د کابل د دولت د قضایاوو دفتر ته مراجعه کېږي؛
2. په کابل کې د دولت د قضایاوو دفتر د نکاح خط لرونکي ته د بانک تعرفه ورکوي او هغه باید د سند د تایید 200 افغانۍ بیه د افغانستان بانک نمایندګۍ کې تحویل او د بانک د آویز کاپي د دولت د قضایاوو دفتر ته وسپاري؛
3. وروسته به په ملي ژبه او د نکاح خط ژباړل شوې نسخې د کابل ولایت اړوند ناحیې د افغان پُست دفتر ته وړل کېږي؛
4. د افغان پُست دفتر غوښتونکي ته د بانک یوه تعرفه ورکوي چې هغه باید د نکاح خط د تایید 200 افغانۍ بیه د افغانستان بانک استازولۍ کې تحویل او د بانک د آویز کاپي بېرته د افغان پُست دفتر ته وسپاري؛ او
5. د افغان پُست دفتر د نکاح خط دواړه کاپي اخلي او غوښتونکي ته د رسید یوه فورمه ورکوي چې په هغه کې د افغان پُست دفتر ته د بیامراجعې نېټه هم لیکل شوی وي؛
6. د نکاح خط د تایید او ټاپې لپاره د افغان پُست دفتر لخوا د بهرنیو چارو وزارت ته لیږل کیږي؛ او
7. غوښتونکی په ټاکلي نېټه د افغان پُست دفتر ته ورځی او د خپل نکاح خط دواړه کاپي ترلاسه کوي.

د مثنی نکاح خط ترلاسه کول

1. مېرمن یا خاوند لومړی یو غوښتنلیک یا عریضه د کابل ولایت د استیناف محکمې یا په اړونده ولسوالۍ کې د ابتداییه محکمې تر سرلیک لاندې چمتو، د موضوع شرح لیکي او د مثنی نکاح خط د ترلاسه کولو غوښتنه کوي؛
2. د مثنی نکاح خط د ترلاسه کولو لپاره د ناکح، منکوحې او شاهدانو انځورونه، د راډیو اعلان سند او د ورک شوي نکاح خط کاپي یا ویجاړشوي اصلي نکاح خط وړاندې کول اړین دي؛ او
3. غوښتنلیک او اړین اسناد د کابل ولایت د استیناف محکمې یا په اړوند ولسوالۍ کې د ابتداییه محکمې ته سپارل کېږي چې د نورو پړاوونو په بشپړېدو سره به مېرمن او خاوند خپل مثنی نکاح خط ترلاسه کړي.

یادونه

د کابل ښار په دننه او د دې ولایت په ولسوالیو کې ابتدايه محکمې فعالې دي او د نکاح خط د وېش خدمتونه وړاندې کوي.