د وینې فشار ته پام ولې ډېر مهم دی؟
د وینې فشار ارثي هم وي او یوه بدي یې دا ده چې نخښه نه لري خو درملنې ته یې نه پاملرنه د مرګ سبب کېږي.
څوک چې د وینې فشار یې لوړ وي، پکار ده چې د ورځې دوه ځلې خپل فشار وګوري، سهار له خوبه تر ویښېدو وروسته او همداراز مازدیګر. خو باید وسواسي نه شو. د وسواس او ستریس په صورت کې مو فشار نور هم ممکن لوړ شي. نو ښه ده چې د ستریس او وسواس په وخت فشار اندازه نه کړو.
منظم سپورت، دوه – درې کیلو وزن کمول، د هوږې او ګریپ فروټ خوړل د وینې د لوړ فشار له کمېدو سره مرسته کوي. خو دا کارونه یا خوراکونه د درملو ځای نه شي نیولی. د لوړ فشار لرونکي باید د عمر تر پایه د ډاکتر تر څارنې لاندې درمل وخوري.
ډاکتران ټولو د لوړ فشار لرونکو ته یو ډول نسخې نه ورکوي بلکې هر ناروغ ته د هغه شرایطو ته په کتو درمل تجویزوي.
کوم کسان چې د وینې فشار یې ټیټ دی، په دې شرط چې ګنګسیت یا سربدالي او بله ستونزه نه لري، ټیټ فشار ورته ستونزه نه پېښوي خو که په شکر د اخته کس د وینې قند ډېر ټیټ شول، خواږه ورکړئ.
