د فلج انسان په ماغزو کې د چیپ نصب
دا چیپ د فلج شویو ناروغانو د مازغو لپاره دی.
چیپ به له معلول سره مرسته وکړي چې هر هغه څه چې یې په ذهن کې ګرځي، د کمپیوټر پر سکرین یا شیشه ټایپ شي.
دا کار د نورالینک کمپنۍ کوي.
هغه کسان چې د نخاع د ټپي کېدو له کبله فلج شوي یا په نورو دماغي ناروغیو اخته شوي، په دې څېړنه کې د رضاکارانو په توګه برخه اخیستی شي.
تراوسه څرګنده نه ده چې د رضاکارانو له منځه به څو تنه غوره شي. دا پروسه به شپږ کاله دوام وکړي.
په دې څېړنه کې، د روباټ په مرسته د مازغو رابط چیپ په مازغو کې د حرکت د کنټرول په ځانګړي ځای کې اېښودل کېږي.
د دې څېړنې اصلي هدف دا دی چې ناروغ د کمپیوټر یا کیبورډ په وسیله هغه څه کنټرول کړي چې په ذهن کې یې ګرځي.
د نورالینک شرکت هیله لرله چې د ۱۰ تنو په مازغو کې به خپل چیپونه کېږدي خو وروسته له دې چې د امریکا د خوړو او درملو ادارې اندېښنه ښکاره کړه، نورالینک د لږ شمېر کسانو په مازغو کې د چیپ د اېښودو په اړه خبرې پیل کړې.
تراوسه پورې څرګنده نه ده چې د امریکا د خوړو او درملو ادارې به په دې څېړنه کې د څو تنو ګډون تایید کړی وي.
ایلن مسک، د نورالینک کمپنۍ خاوند دی.
هغه نورالینک ته ډېرې لویې هیلې لري او غواړي چې د زیات چاغښت، اوتیزم، او ذهني پریشانۍ د درملنې لپاره د چیپونو د نصبولو جراحي چټکه کړي.
