روسیې ۵۰ کاله وروسته بیا سپوږمۍ ته فضايي ماموریت پیل کړ
روسیې له شاوخوا ۵۰ کالونو وروسته د لونا-۲۵ فضايي بېړۍ په استولو سره سپوږمۍ ته خپل فضايي ماموریت بیا پیل کړ.
د روسیې فضايي ادارې «روسکاسموس» ویلي چې د لونا-۲۵ فضايي بېړۍ یې د مسکو د «وستوچني» له فضايي مرکز څخه وتوغوله.
د لونا-۲۵ فضايي بېړۍ څلور پایې او شاوخوا ۸۰۰ کیلو ګرام وزن لري او ټاکل شوې چې په پنځو ورځو کې د سپوږمۍ مدار ته داخله شي. دا فضايي بېړۍ به شاوخوا اووه اونۍ تېروي چې د سپوږمۍ په جنوبي قطب کې ځان ته مناسب ځای پیدا کړي.
د روسیې د فضايي ادارې یو مقام الکساندر بلوخین ویلي دي چې په تاریخ کې به په لومړي ځل د سپوږمۍ په جنوبي قطب کې یوه فضايي بېړۍ کیني. هغه وویل چې تر دې مخکې نورې بېړۍ د سپوږمۍ استوايي ناحیې ته نژدې کېناستلې وې.
د روسیې ولسمشر ولادمیر پوتین ټېنګار کړی دی چې د لویدیځ له بندیزونو سره سره به مسکو د سپوږمۍ د ماموریت د پراختیا لپاره د پخواني شوروي اتحاد په څېر کار وکړي. هغه ویلي چې د نوي ماموریت د بري چانس یې ۷۰ سلنه دی.
په ۱۹۷۶کال کې د شوروي اتحاد فضايي بېړۍ د سپوږمۍ څخه د خاورو نمونې ځمکې ته ښکته کړې وې .
