سویډن کې د ۴۷۰۰ افغانانو د پاسپورټونو بې اعتباره کیدل
د سویډن د کډوالو ادارې لخوا د افغان پاسپورټونو د باطلولو اعلان وروسته زرګونه افغان کډوال د خپل استوګنې، کار او کډوالۍ خدماتو له لاسه ورکولو له خطر سره مخ دي.
د سویډن د مهاجرت ادارې اعلان وکړ چې د روان کال د اکتوبر له لومړۍ نیټې څخه، هغه افغان پاسپورټونه چې د سټیکرونو په بڼه نوي شوي دي نور به په هیواد کې د سفر، استوګنې یا کډوالۍ خدماتو لپاره د اعتبار وړ اسنادو په توګه ونه منل شي.دا پریکړه د سویډن حکومت د مخ په زیاتیدونکي سختو کډوالۍ پالیسیو یوه برخه ده چې له دوه زره پنځلسم کال راهیسې په تدریجي ډول سختې شوې دي.په سویډن یا ګاونډیو هیوادونو کې د فعال افغان سفارت د نشتوالي او همدارنګه د مالي او اداري ستونزو له امله، ډیری افغان کډوال نشي کولی نوي پاسپورټونه ترلاسه کړي.دا پلان به لږترلږه څلورزره اوه سوه افغان کډوال د دوی د کار یا استوګنې جوازونو د نوي کولو له خطر سره مخ کړي.
