د ایران او افغانستان ترمنځ د ګرځندوی پر همکارۍ ټینګار
په تهران کې د سرپرست حکومت د سفارت کلتوري اتشه د ایران د کلتوري میراث او ګرځندوی وزیر له سلاکار سره په لیدنه کې د ایران او افغانستان ترمنځ د ګرځندوی همکارۍ پر پراختیا ټینګار وکړ.
د اطلاعاتو او کلتور وزارت مطبوعاتي دفتر وویل چې په تهران کې د افغانستان په سفارت کې د دې وزارت کلتوري اتشه عزت الله آصف د کلتوري او ګرځندوی چارو د اسانتیا لپاره د ایران د کلتوري میراث، ګرځندوی او لاسي صنایعو وزارت له سلاکار حجت الله ایوبي سره وکتل.په دې غونډه کې حجت الله ایوبي ټینګار وکړ چې کلتور او کلتوري چارې هیڅ پوله نه پېژني. هغه همدارنګه ټینګار وکړ چې دوی د دواړو هېوادونو ترمنځ د ګډې همکارۍ لپاره فرصتونه لټوي.د هغه په وینا، د کلتوري فعالیتونو لپاره پراخ امکانات شتون لري او د دې فعالیتونو اسانتیا د دوی له لومړیتوبونو څخه ده.له بلې خوا، عزت الله آصف هغه پروګرامونه معرفي کړل چې د دواړو هېوادونو لپاره د اړیکو او همکارۍ د پراختیا لپاره خورا ستراتیژیک اهمیت او ارزښت لري او د دې فعالیتونو پلان جوړونه یې په ګوته کړه.
