د کرکټ د اتلانو جام مهالوېش اعلان
د کرکټ نړیوالې شورا پرون د اتلانو جام یا چمپینز ټرافي مهالوېش اعلان کړ
افغانستان په لومړي ځل په دې سیالیو کې ګډون کوي او په بي ګروپ کې به له جنوبي افریقا، انګلستان او اسټرالیا سره سیالۍ وکړي. د مهالوېش له مخې به د افغانستان لومړۍ سیالي د فبرورۍ میاشتې په یوویشتمه نېټه په کراچۍ ښار کې له جنوبي افریقا سره وي. په پام کې وه چې دا ځل د اتلانو جام ټولې سیالۍ په پاکستان کې ترسره شي، خو دې ته په پام چې هندي لوبډله دې هیواد ته نشي ورتلی، متحده امارات به د هند د ټولو سیالیو کوربتوب کوي.د کرکټ د نړیوالې شورا د مهالویش له مخې دغه جام به د دوه زره پنځه ویشتم کال د فبرورۍ میاشتې په نولسمه نېټه د پاکستان په کراچۍ ښار کې د پاکستان او نیوزیلنډ د لوبډلو ترمنځ په سیالۍ سره پیل شي او پایلوبه به یې د مارچ په نهمه نېټه د لاهور په ښار کې وي. د افغانستان دوهمه لوبه له انګلستان سره ده چې د فبرورۍ په شپږویشتمه نیټه به په همدې لاهورښارکې ترسره شي
