د کرکټ یو ورځنۍ نړیوالې سیالۍ، افغانستان لومړۍ لوبه له سریلانکا څخه وګټله
د افغانستان او سریلانکا ترمنځ د کرکټ د نړیوالو یو ورځنیو سیالیو په لومړۍ لوبه کې زموږ د هېواد ملي لوبډلې سریلانکا ته ماتې ورکړه.
دا سیالي پرون د مهیندا راجاپاکسا په نړیوال لوبغالي کې وشوه.په دې لوبه کې افغان اتلانو د سریلانکا لوبډلې ته په شپږو ویکټو ماتې ورکړه.په دې لومړۍ لوبه کې د سریلانکا کرکټ ملي لوبډلې د افغانستان ملي لوبډلې ته دوه سوه نهه شپېته منډې هدف وټاکه. زموږ د هېواد ملي لوبډلې وکولای شول دغه هدف یوازې د څلورو لوبغاړو په سوځېدو سره پوره کړي. په دې لوبه کې ابراهیم ځدراڼ په یوازې ځان اته نوي او رحمت شاه زرمتي پنځه پنځوس منډې جوړې کړې.د توپ اچونې په برخه کې فرید ملک او فضل الحق فاروقي هم ښه وځلېدل او هر یو یې دوه دوه سیال لوبغاړي وسوځول.د دې لوبې په ګټلو سره افغانستان له سریلانکا څخه یوه نمره مخکې دی. د دواړو لوبډلو ترمنځه نورې دوه سیالۍ به د یکشنبې او چهارشنبې په ورځ ترسره كېږي.
تگ
