د زرغون جام کرېکټ سیالۍ به راتلونکې اونۍ په خوست ولایت کې پیل شي

ثور 04, 1402 10:27 Asia/Kabul

د افغانستان کرېکټ بورډ اعلان کړی چې د زرغون جام کرېکټ سیالۍ به راتلونکې اونۍ په خوست ولایت کې پیل شي.

د افغانستان د کرېکټ بورډ د داخلي څانګې مشر نظیم جار عبدالرحیم زی ویلي، چې دغه سیالۍ به د راتلونکې شنبې په ورځ پیل شي او نولس ورځې به دوام وکړي.

دده په وینا؛ په دې ټورنمنټ کې به څلور لوبډلې برخه ولري چې د دغو ټیمونو ټول غړي پیاوړي دي.

دغه راز د هېواد د کرېکټ د ملي لوبډلې د پام وړ شمېر لوبغاړي هم په دغو لوبډلو کې لوبېږي.

دا په داسې حال کې ده چې په کندهار ولایت کې به هم ډېر ژر د څلورو لوبډلو په ګډون د ایمرجینګ کرېکټ سیالۍ پیل شي.

په دغو سیالیو کې به د دوه اونیو لپاره له درویشتو کلونو کم عمره ځوانان سیالي وکړي.