برگزاری نشست امنیتی هرات در تاجیکستان/بر ایجاد دولت فراگیر تاکید شد
دهمین نشست امنیتی هرات در تاجیکستان در حال برگزاری است و شرکت کنندگان بر ایجاد دولت فراگیر در افغانستان تاکید دارند.
به گزارش تلویزیون سحر افغانستان، دهمین نشست امنیتی هرات زیر عنوان «نظام سیاسی فراگیر؛ الگوها و نقشه راه» در سالن کنفرانس‌های کتابخانه ملی تاجیکستان برگزار شده است.
در این نشست که برای دو روز ادامه خواهد داشت، نزدیک به ۲۰۰ نفر از کشورهای مختلف شرکت کرده اند.
مقام‌های تاجیکستان تاکید دارند که میزبانی آنها از نشست امنیتی هرات و برگزاری آن در کتابخانه مرکزی تاجیکستان نشانه سیاست صلح جویانه این کشور درباره افغانستان است.
تاجیکستان تصریح کرد که سیاست این کشور حمایت از ایجاد یک حکومت فراگیر در افغانستان است؛ زیرا ایجاد چنین حکومتی می‌تواند منجر به پایان منازعه نیم قرنه افغانستان و دستیابی به عدالت اجتماعی شود.
مقامات تاجیک در این نشست تاکید کردند که این نشست کارشناسی است و علیه هیچ نظام و کشور و یا سیاستی نیست، بلکه بستری برای گفتگوی متنوع در رابطه با مسایل افغانستان است.
در مراسم افتتاحیه این نشست نخست مقام‌های تاجیکستان و سپس رنگین دادفر اسپنتا، رئیس هیأت مشورتی انستیتو مطالعات استراتژیک افغانستان، سخنرانی کرد.
دهمین نشست امنیتی هرات در حالی در تاجیکستان آغاز می‌شود که این نشست همه ساله با میزبانی افغانستان برگزار می‌شد.
تگ
