تاجیکستان: 3 هزار پاسپورت به گروههای تروریستی در افغانستان داده شده است

میزان 28, 1401 19:05 Asia/Kabul

وزیر کشور تاجیکستان اعلام کرد که حکومت موقت طالبان تاکنون به بیش از 3 هزار نفر از اعضای گروههای تروریستی پاسپورت افغانستانی داده‌اند.

به گزارش تلویزیون سحر افغانستان، «رمضان رحیم زاده» وزیر داخله/کشور تاجیکستان در شهر «دوشنبه» گفت: طالبان تاکنون به بیش از 3 هزار نفر از «اعضای گروه‌های تروریستی» پاسپورت افغانستان ارائه کرده‌اند.

وی اظهارداشت که این وضعیت یک‌بار دیگر خطر طالبان را تایید می‌کند و مشکلات افغانستان باید در کانون توجه همه باشد.

این سخنان در حالی مطرح شده است که «امامعلی رحمان» رئیس جمهور تاجیکستان نیز به تقویت گروههای تروریستی در افغانستان اشاره کرده بود.

وی گفته بود که افراط‌گرایی و تروریسم هیچ ربطی به ملت، دین، مذهب و تابعیت ندارد. بنابراین راه درست مبارزه موثر با این پدیده همکاری صادقانه کشورها، سازمان های منطقه‌ای و بین المللی و جامعه جهانی می‌باشد.

بر اساس اظهارات مقامات تاجیکستان خطرناک ترین سازمان های تروریستی در جهان همچنان در مرز تاجیکستان و افغانستان در حال فعالیت هستند.