ایجاد اردوگاه موقت برای مهاجران افغان در تاجیکستان
تاجیکستان از ساخت اردوگاههای موقت برای ورود احتمالی شهروندان افغانستان در جنوب شهر دوشنبه خبر داد.
به گزارش تلویزیون سحرافغانستان، گفته می‌شود که تاجیکستان برای ورود احتمالی شهروندان افغانستان با حمایت کمیساریای عالی پناهندگان سازمان ملل و بنیاد آغاخان همچنین یونیسف، اردوگاههای موقت در این کشور ایجاد کرده است.
«حمیده یوسفی» سخنگوی کمیته حالت های ویژه تاجیکستان، گفت:«این اردوگاه ۶۴ خیمه دارد و با خط برق، آب، حمام و آشپزخانه پیوست شده اند.»
کارشناسان روابط بین‌الملل این اقدام تاجیکستان را نوعی همکاری با مردم غیرنظامی دانسته و می‌گویند به دنبال تحولات و اتفاقات امنیتی و نظامی در ولایت‌های شمالی که افزایش پیدا می‌کند این اقدام راهکاری است تا مردم بتوانند پناهگاهی برای خود بیابند.
«فهیم کوه دامنی»، دیپلمات پیشین در تاجیکستان، می گوید: «بازرسی خانه به خانه، دستگیری افراد دولتی و حتی شکنجه و برخورد های تبعیض آمیز باعث شده اند که مردم به ستوه بیایند.»
در این میان کمیساریای عالی پناهندگان سازمان ملل از کشورهای مهاجر پذیر خواسته است تا به مهاجران افغانستان در این کشورها امکانات و سهولت های بیشتری را فراهم کنند.
سازمان ملل همچنین گفته است که میلیون ها نفر در افغانستان غذای کافی ندارند و از این رو مجبور شده‌اند که خانه‌هایشان را ترک کنند و به کشورهای دیگر پناه ببرند.
در حال حاضر، میلیون‌ها نفر از شهروندان افغانستان در کشورهای گوناگون مهاجر شده‌اند اما ایران و پاکستان از کشورهای هستند که بیشترین شمار مهاجران افغانستان را در خود دارند.
انتهای پیام.
تگ
