احتمال میزبانی تاجیکستان از مذاکرات «احمد مسعود» و طالبان
منابع روسی اعلام کردند که تاجیکستان به احتمال بسیار میزبان مذاکرات احمد مسعود رهبر «جبهه مقاومت ملی افغانستان» و حکومت طالبان خواهد شد.
به گزارش تلویزیون سحر افغانستان، منابع روسی خبردادند که جبهه مقاومت ملی افغانستان به رهبری احمد مسعود قصد دارد کنفرانسی را با طالبان در شهر دوشنبه پایتخت تاجیکستا برگزار کند.
اسپوتنیک در این باره نوشت که در حال حاضر تاریخ برگزاری این کنفرانس مشخص نشده است، اما قرار است نمایندگان احزاب سیاسی، روشنفکران، شخصیت‌های عمومی، در مجموع 50 نفر برای شرکت در آن، دعوت شوند.
هدف این کنفرانس یافتن راه حل سیاسی برای بحران کنونی و ایجاد یک حکومت فراگیر با مشارکت همه نیروهای سیاسی در افغانستان عنوان شده است.
این در حالی است که سفارت افغانستان در تاجیکستان اظهار داشت که در مورد برگزاری چنین کنفرانسی اطلاعاتی در اختیار ندارند، زیرا نه نمایندگان جبهه مقاومت ملی و نه نهادهای رسمی در این مورد به آنها اطلاع نداده‌اند.
وزارت امور خارجه تاجیکستان به نوبه خود در این مورد گفت که نمی‌توانند این اطلاعات را تایید یا آن تکذیب کنند. با این حال نهاد دیپلماتیک تاجیکستان با خودداری از ارائه جزئیات بیشتر تایید کرده که بررسی این موضوع در حال انجام است.
تاجیکستان از دیرباز به عنوان محل مذاکرات طرف‌های درگیر در افغانستان برای آشتی تلقی می‌شد. این موضوع برای اولین بار در سپتامبر سال گذشته بین «امامعلی رحمان» رئیس جمهور تاجیکستان و «عمران خان» نخست وزیر پاکستان بررسی شد.
هر دو کشور در مورد همکاری برای برگزاری مذاکرات میان طالبان و تاجیک‌های افغانستان در دوشنبه توافق کردند، اما تاکنون چنین دیداری در شهر دوشنبه، صورت نگرفته است.
ضمنا، اطلاعات مربوط به دیدار مسعود و طالبان در تاجیکستان پس از سفر «ولادیمیر پوتین» رئیس جمهور روسیه به «دوشنبه» در تاریخ 28 ژوئن منتشر می‌شوند.
بنابر برخی گزارش‌ها، رئیس جمهور روسیه در دوشنبه با مسعود دیدار کرده است و دیدگاه وی را در مورد وضعیت در افغانستان جویا شده است.
انتهای پیام.
